Máis de 3.000 firmas recollidas para reclamar "un tren digno para Lugo"

O BNG afirma que esta campaña "busca pór á provincia no mapa dos servizos ferroviarios"
Un tren. ARCHIVO
photo_camera Un tren Alvia. ARCHIVO

O BNG informou de que, nas últimas semanas, e dentro da súa campaña Lugo quere tren, conseguiu reunir máis de 3.000 firmas para reclamar uns servizos ferroviarios dignos para a provincia, con conexións que realmente "sexan útiles" para os lucenses.

Os nacionalistas afirman que esta campaña "busca pór a Lugo no mapa dos servizos ferroviarios, terminando con anos de recortes e eliminación de servizos que son necesarios para os veciños e veciñas" da provincia, en xeral, e da capital lucense en particular.

O responsable local do BNG en Lugo, Felipe Rivas, informou aos medios de comunicación de que a recollida de firmas continuará a partir de agora a través da plataforma change.org, aínda que o partido nacionalista seguirá colocando unha mesa para seguir recollendo apoios todos os mércores ata final de mes.

"É necesario dotar a Galicia de servizos ferroviarios dignos, con conexións interiores útiles, pensadas para conectar aos galegos e galegas", dixo á prensa Rivas.

A campaña Lugo quere tren comezou o pasado mes de novembro, cunha concentración ante a estación de tren de Lugo.

Entre as reclamacións que impulsan esta iniciativa está a posta en marcha da variante de Parga (Guitiriz) ou a creación dun novo tramo de vía entre Curtis e Ordes para permitir unha conexión directa en tren entre Lugo e Santiago de Compostela.

"Lugo é a única cidade de Galicia que non ten conexión directa por tren coa capital do país, un agravio que quedaría resolto cunha obra de 27 quilómetros", precisou Rivas. 

comentarios