A xunta de goberno local aprobará hoxe as bases do proceso selectivo para ocupar a praza de director da banda municipal de música, logo de renunciar hai meses á anterior convocatoria tras ser cuestionada por informes técnicos e polos sindicatos.
Segundo avanzou este martes a concelleira de cultura, Maite Ferreiro, o proceso "será por oposición libre e a persoa que acade a praza asumirá a xefatura do servizo dá banda e dá Escola Municipal de Música".
O máximo posto da centenaria formación musical está vacante desde a xubilación do anterior director en setembro de 2016, o que impediu que se ofrecesen concertos. Tras a aprobación das bases procederase á convocatoria das probas selectivas e, segundo Ferreiro, esperan que, xunto coa aprobación da nova RPT, "se vaia consolidando este servizo público municipal".
Por outra banda, a xunta de goberno tamén ten previsto rexeitar este mércores as alegacións presentadas pola anterior xefa do servizo de persoal, que foi destituída polo goberno local debido ás "irregularidades" rexistradas na súa xestión.
Antonio Ameijide, explicou que esperan que haxa un apoio unánime da corporación para abrir esta investigación
De feito, este cesamento e as razóns argumentadas para o mesmo, levaron ao grupo municipal do PP a solicitar unha comisión de investigación sobre a política de persoal desenvolvida durante os anos de goberno socialista no Concello.
O viceportavoz popular, Antonio Ameijide, explicou que esperan que haxa un apoio unánime da corporación para abrir esta investigación e saber como se chegaron a asinar ata 228 nomeamentos irregulares por decreto de postos de traballo no Concello e pedirán que comparezan na comisión os políticos que formaban parte das xuntas de goberno que tomaron tales decisións.
Por outra banda, o concelleiro de Cs Juan Vidal anunciou que pedirá ao goberno local que aclare o papel que xogará a figura de libre designación para as xefaturas de servizo na nova RPT.
