O municipio lucense unirase á tendencia de turismo de natureza que puxeron de moda os chamados glampings, unha especie de cámpings de luxo con instalacións ecolóxicas, e o próximo verán contará cun complexo deste tipo con cabanas de madeira na parroquia do Veral, nunha leira situada nunha contorna natural privilexiado xunta ao río Mera.
O matrimonio formado por Verónica Cela e Pablo Yanes porá en marcha este complexo integrado por catro cabanas e un centro de recepción que comezará a levantarse de inmediato, tendo en conta que onte foi concedida a licenza de obra na primeira xunta de goberno local do novo mandato.
Pablo Yanes explica que levan dous anos de trámites desde que se decidiron a situar no Veral o complexo turístico, xa que foi necesario dispor dos permisos da Confederación Hidrográfica para instalar unha minidepuradora, así como doutros organismos públicos como o Concello.
Engade que a partir de agora poranse ao choio, porque tamén eles colaborarán nos traballos, co obxectivo de que o complexo turístico estea aberto o próximo verán.
Pablo Yanes explica que o obxectivo é que o glamping, que se denominará Cabanas das Chousas pola proximidade coa ruta do mesmo nome, sexa o máis respectuoso posible coa contorna. Así, faranse construcións en madeira levantadas do chan e que poderán aloxar a catro ou incluso máis persoas, ademais de contar con todos os servizos dun establecemento turístico "con todo luxo de detalles".
"Imos intervir o mínimo no terreo para que se poida gozar plenamente da natureza", comenta un dos promotores deste complexo de ecoturismo que será pioneiro en Lugo e que busca que os clientes poidan "desconectar" da estresante vida urbana, á vez que gozar dunha contorna natural con rutas fluviais ou zonas de escalada.
