O Concello de Lugo e a Deputación de Provincial concluíron os trámites urbanísticos para poder outorgar a licenza da que estaba pendente a asociación Raiolas para pór a funcionar o primeiro centro de día para persoas con autismo da provincia, unhas instalacións que estarán situadas na antiga gardería do campus universitario, que nunca chegou a abrir as súas portas.
O portavoz do goberno local, Miguel Fernández, informou de que o Concello de Lugo aprobou este mércores a cesión por parte da Deputación de Lugo dos terreos do aparcadoiro do campus universitario, anexo á Biblioteca Intercentros, cunha superficie de 7.678 metros cadrados.
Eses terreos serán destinados agora a un viario público, que deberá urbanizar a propia Deputación, de acordo coa decisión adoptada pola institución provincial no pleno de marzo.
Liquidado ese trámite, precisou Miguel Fernández, que levou incluso a unha corrección de erros no Plan Xeral de Ordenación Municipal (PXOM), o Concello de Lugo pode agora aprobar a licenza a Raiolas.
Logo de meses bloqueada, o Concello de Lugo aprobará esa licenza na xunta de goberno da próxima semana.