O Concello de Lugo resístese a suspender o Arde Lucus, a festa de Interese Turístico Nacional que evoca o pasado romano da cidade, porque esa celebración é un auténtico "revulsivo económico" para a cidade, non só para o sector da hostalería, senón para boa parte do comercio local.
Aínda que si se viu obrigado a modificar as datas do Arde Lucus Cultural, que é o programa de actividades culturais que organiza o Concello de Lugo con carácter previo, a modo de prólogo da festa romana, o goberno local non estudia de momento a suspensión do Arde Lucus, que está previsto que se celebre entre os días 25 e 28 de xuño.
A alcaldesa de Lugo, Lara Méndez, dixo que a decisión tomarase no seu momento sempre de acordo con criterios "de seguridade e saúde, que é o principal neste momento", pero opina que é demasiado pronto para facelo e prefire "esperar" para ver como evoluciona a urxencia sanitaria.
"Estamos á espera de ver como evoluciona esta crise sanitaria. Día a día hai cambios, incluso na lexislación e a normativa que chega por parte do Goberno", dixo a rexedora local.
"Non queremos precipitarnos na toma de decisións", engadiu Lara Méndez, porque o Arde Lucus é "un revulsivo económico" para a cidade, non só para os sectores da "hostalería e a hotelería", que probablemente son os máis beneficiados, senón tamén "para o comercio local".
A festa, recordou Méndez, move un "consumo" que, doutro xeito, non se produce.
Lugo resístese a suspender o Arde Lucus por agora: "É un revulsivo económico"
Lara Méndez dixo que a decisión tomarase no seu momento sempre de acordo con criterios "de seguridade e saúde, que é o principal neste momento"
