Un minuto de silencio serviu este luns, Día Mundial das Vítimas de Accidentes de Tráfico, para conmemorar a xornada recordando ás dez persoas que faleceron este ano en accidentes nas vías da provincia. Desde o 1 de xaneiro de 2021 producíronse dez accidentes mortais, todos na estrada, con dez persoas falecidas, o que segundo recordou a Subdelegación do Goberno implica que se rexistrou un descenso global na sinistralidade viaria dun 28% en Lugo con respecto ás mesmas datas do ano anterior.
A subdelegada, Isabel Rodríguez, apelou á cidadanía lucense a seguir avanzando nesa redución anual, que afecta tamén aos feridos en accidentes de tráfico. Así, nas estradas e vías urbanas da provincia producíronse este ano 330 accidentes, que provocaron 48 feridos hospitalizados e 383 leves.
O acto de conmemoración tivo lugar na sede da Xefatura Provincial de Tráfico de Lugo e consistiu na lectura do manifesto aprobado este ano, seguido polo minuto de silencio en recordo das vítimas mortais ou persoas que resultaron feridas en distintos sinistros.
O Día Mundial das Vítimas de Accidentes de Tráfico foi instaurado pola Onu en 2005 e cada ano adopta unha lema ou se centra nunha peculiaridade para a súa conmemoración. Neste ano 2011, pon o foco na redución da velocidade do tráfico para previr moitas mortes e lesións graves, en particular os peóns e todos os demais usuarios vulnerables da estrada: nenos, anciáns e discapacitados.
A subdelegada do Goberno en Lugo recordou que o ano pasado faleceron dúas persoas por atropelo na provincia, o mesmo número que este ano ata novembro.
Con esa celebración preténdese, en último termo, concienciar da necesidade de condución segura, tendo en conta que non só se debe ter en conta a presenza doutros vehículos na estrada senón tamén a dos peóns.
