A provincia de Lugo perdeu onte a un dos seus hostaleiros máis apreciados, José Lombao Lence. que faleceu en Castroverde, aos 68 anos de idade.
O finado rexentou coa súa muller, María Fouz, distintos establecementos. En Lugo, durante vinte e un anos dirixiron O Candil, na Praza do Cantiño, onde se fixeron moi coñecidos e conseguiron unha clientela fiel.
En 2003 decidiron empezar unha nova etapa e abriron O Recuncho de Pepe e de María, na súa casa familiar de Cobelas, en Castroverde, que acababan de restaurar.
Alí María, unha virtuosa da cociña, ofrece desde entón, ata o de agora coa axuda de José, exquisitos pratos, coa caza como gran atractivo.
José Lombao será despedido hoxe ás sete da tarde no Tanatorio Marzo de Castroverde e o seu corpo descansará para sempre no cemiterio parroquial de Cobelas.
AGRADECEMENTO. A familia da finada Amalia Vázquez Mourenza (q.e.p.d.), ante a imposibilidade material de contestar ás numerosas testemuñas de pésame, agradece por este medio a asistencia aos actos de funeral e enterro celebrados o pasado día 27, en San Juan de Apregación (Friol), e as mostras de condolencia recibidas.
