O San Froilán da pandemia despediuse este luns dos lucenses ata o ano que vén logo de oito días de festa totalmente diferentes ao que marca o costume e nos que a premisa era garantir ao máximo a seguridade do público nos distintos actos que se organizaron. Sen multitudes, a cidade viviu as festas con bastante ambiente na rúa.
A poucas horas do peche do programa, Maite Ferreiro, a concelleira de cultura, aseguraba que o obxectivo estaba cumprido e engadía que Lugo se converteu en exemplo de como se pode garantir o acceso á cultura con seguridade en tempos de pandemia.
"Durante a semana cultural do San Froilán a veciñanza de Lugo demostrou o seu apoio ao sector cultural e damos por cumprido o obxectivo de colaborar na reactivación do sector cultural e demostrar que a cultura é un ben de primeira necesidade no que non se descoida a seguridade. Sen a prudencia e a responsabilidade dos veciños, o San Froilán non sería posíbel este ano", indicou Maite Ferreiro, que destacou a colaboración do persoal municipal, da Policía Local, dos bombeiros, do servizo de limpeza e tamén das distintas empresas e asociacións que se implicaron nos actos.
A festa foi este ano por barrios e, a falta de datos sobre o número de visitantes ou o aforamento que tiveron os concertos, os hostaleiros de distintas zonas comprobaron na súa recadación que estas festas non tiveron nada que ver con edicións anteriores. Houbo bares, situados ao pé dalgún dos escenarios, como O Cincuenta e Seis, nas Fontiñas, onde aseguraron que este ano non houbo a metade das reservas de mesas que outros anos. Houbo ata un 80 por cento menos de reservas, o que xa é un indicador de como foi este San Froilán anómalo.
"Aquí duplicamos os pedidos de polbo para casa. No local, tivemos a metade de xente que outros anos"
"Este ano non tivo nada que ver cos outros. A demanda de racións de polbo para levar para a casa foi similar que en anos pasados ou aínda pódese dicir que foi máis grande pero, en cambio, todos os días houbo espazo libre no comedor, o que outros anos non pasaba pois xa en agosto e en setembro había reservas feitas para lestes días. Este ano, non tivemos nin unha soa comida familiar. En liñas xerais, pódese dicir que baixou este ano a clientela nun 80 por cento", afirman no local.
O feito de ter un dos escenarios dos concertos xusto enfronte do establecemento contribuíu a dar algo máis de ambiente á zona, pero isto non repercutiu en toda a rúa. Por exemplo, no Pan do País manifestaban que non notaran para nada a colocación dun escenario en Fontiñas. "Os concertos non influíron nada no noso caso. Aquí mal non estivemos, pero moi ben tampouco", di unha traballadora.
Tampouco houbo avalancha na Ponte, onde se colocou outro dos escenarios. "A iniciativa estivo ben e veu algo de xente dos concertos pero ao haber un aforamento reducido, non notamos moita clientela. Se fose nunha situación normal, sería xenial", afirman no bar A Calzada.
Na pulpería As Catro Rúas, da Milagrosa, notaron tamén un aumento dos pedidos de polbo para levar a casa aínda que recoñecen que os caldeiros restáronlles público, especialmente porque os prezos das racións son máis baixos que os que manteñen todo o ano as pulperías.
"Aquí duplicamos os pedidos de polbo para casa. No local, tivemos a metade de xente que outros anos. Os caldeiros non nos fixeron moita competencia, pero si restaron público porque eles pon a ración a 10 euros e as pulperías, a 12 ou 13, pero a calidade tamén se paga", aseguran nas Catro Rúas.
