A asociación Lugo Monumental cre que os hostaleiros se arriscan a fortes sancións se se acollen ao bando da alcaldía sobre o peche das terrazas, xa que supón o incumprimento de normas sanitarias, asegura.
O goberno local, en tanto, rexeitou as afirmacións da asociación e asegurou que os hostaleiros que se acollan ao bando para intentar facer máis confortables as terrazas poden estar tranquilos, xa que as normas axústanse ás medidas establecidas pola Xunta e non contraveñen ningunha normativa nin lei, sostén.
O Concello recordou que as normas que aprobou para as terrazas teñen carácter excepcional e temporal, xa que estarán vixentes durante o tempo que se manteñan as restricións pola pandemia.
O goberno local defendeu que non é momento de crear incerteza nun sector que está a sufrir unha situación especialmente crítica polo covid.
Lugo Monumental, en tanto, sostivo que a hostalería pode atoparse cun novo problema coas terrazas, que son a táboa de salvación de moitos negocios, polo cumprimento do bando municipal. Este permite pechar tres laterais dunha terraza para que a clientela estea máis cómoda e compensar así as limitacións de aforamento interior, pero iso pode carrexar sancións por parte de Sanidade, xa que segundo a lei eses espazos terían a consideración de interiores para todos os efectos, segundo a asociación que agrupa a empresarios do centro.
O colectivo di que a lei considera espazo ao aire libre todo espazo non cuberto ou o que estando cuberto estea rodeado lateralmente por un máximo de dúas paredes, muros ou paramentos. Asegura que contrastou coa Xunta a interpretación desa norma e que a Consellería de Sanidade confirmou que a normativa impide o modelo de peche de terrazas que se contemplou na capital para o sector hostaleiro.
