O colectivo Lugo Monumental, que agrupa aos negocios do centro histórico da cidade, reuniu 2.000 firmas, que entregará este xoves pola mañá no Rexistro da Xunta de Galicia, para expresar a súa oposición ao traslado da estación de autobuses desde a súa actual localización ata a praza de Conde Fontao, onde pasará a formar parte da futura intermodal.
O presidente de Lugo Monumental, Luís Latorre, precisou que este colectivo reuniu 1.675 firmas "en papel", ás que hai que sumar as 511 que se poden consultar na plataforma Change.org.
Precisou que "a céntrica localización da actual estación é a clave desta campaña, xa que segundo os propios estudos da Xunta de Galicia, a maioría dos viaxeiros" que fan uso das liñas de bus acceden a pé a esa instalación.
Os asinantes reclaman que se manteña a actual localización da estación, pero que sexa reformada e modernizada, para que esas instalacións poidan "servir á súa finalidade coa dignidade que require".
Ademais, Latorre precisou que Lugo Monumental non realizou unha campaña de captación "de firmas", senón que foron os propios lucenses, por iniciativa propia, quen se decidiron a asinar.
A asociación solicitou reunións coa conselleira de Infraestruturas, Ethel Vázquez, e coa presidenta de Adif, Isabel Pardo de Vera, aínda que de momento non obtivo resposta a esa petición.
Lugo Monumental pide "un debate sereno, obxectivo e aberto" para que se poida reformular a decisión de recolocar a estación de autobuses.
