A asociación Lugo Monumental, que agrupa aos negocios do centro histórico da cidade, informou de que se dirixirá ao Concello e á Xunta de Galicia para que ambas as administracións colaboren na posta en marcha dun plan de escavacións arqueolóxicas, co obxectivo de planificar con maior seguridade proxectos de futuro no recinto amurallado.
Este colectivo recorda que, a día de hoxe, "o maior inconveniente para rehabilitar un edificio" ou incluso realizar unha nova construción no centro histórico é "o probable perigo" para os investidores de que aparezan na leira "restos arqueolóxicos", dado que o custo da escavación "corre a cargo do promotor, aínda que o que apareza é propiedade da Administración".
Lugo Monumental recorda que "está a favor da escavación, estudo e conservación do noso patrimonio, pero tamén de buscar solucións para os propietarios que hoxe en día non se atreven a rehabilitar os seus inmobles, xa que corren un serio risco de ruína".
Nese sentido, a asociación recorda que a propia Universidade de Santiago de Compostela tivo que "gastar varios millóns de euros e modificar o seu proxecto inicial ao aparecer" no solar da sede do Vicerreitorado "a domus do Mitreo".
"A idea básica é sinxela", engade Lugo Monumental, porque se trata de adiantar" as escavacións e de realizalas xa en todos os solares e locais que os propietarios poñan a disposición, de modo que se poida planificar o futuro desas parcelas" con coñecemento "dos restos" romanos que "poidan ter".
Para iso, Lugo Monumental propón executar a partida orzamentaria que o Pepri recolle desde os anos 90 para este tipo de actuacións, que ascende a 1,2 millóns de euros, e que nunca chegou a investirse.
Ademais, Lugo Monumental recorda que a propia conselleira de Medio Ambiente, Ángeles Vázquez
