Lugo Monumental prepara unha campaña para eliminar pintadas do centro histórico

Lugo Monumental, o colectivo que agrupa aos negocios do centro histórico da cidade, está a preparar unha campaña para eliminar as pintadas que afean diversos espazos urbanos do recinto amurallado, porque considera que son unha mostra máis da degradación e a deterioración que padece esta parte da capital lucense como consecuencia de comportamentos incívicos.

O presidente de Lugo Monumental, David Fernández, considera que a degradación do centro histórico da cidade, no que conflúen tres elementos Patrimonio da Humanidade –a Muralla romana, a Catedral e o Camiño Primitivo–, é un problema con diferentes arestas, pero no fondo consecuencia dunha mesma circunstancia "a falta de sensibilidade coa contorna no que estás".

Recordou que á parte de problemas puntuais pola aglomeración de xente nas zonas de movida nocturna, como o botellón que se celebrou a pasada fin de semana no atrio da Catedral, "a contorna está feita unha porcallada", porque é habitual que "a xente ouriñe contra as paredes". "O cheiro ás veces é repugnante", lamentou o presidente de Lugo Monumental, quen só ve unha posible solución para acoutar este problema e pasa por unha maior vixilancia policial.

Desde o seu punto de vista, estamos "a falar dun problema de orde pública", porque "existe unha normativa" e a obrigación daqueles que ostentan o goberno é facer "cumprir esa normativa." Con respecto ás pintadas, opina que son "parte do mesmo", polo que Lugo Monumental ten pensado realizar unha campaña de concienciación social.

Ademais, o colectivo de empresarios iniciou contactos cos propietarios dos veciños afectados para conseguir o permiso que necesita antes de iniciar a limpeza das fachadas.

A empresa concesionaria do servizo de limpeza, Urbaser, "quítaas", recordou Fernández, pero para iso "necesita o permiso dos veciños", porque se "queda algunha marca" ou a fachada sofre algún tipo de "decoloración", non se fai cargo diso.