A asociación Lugo Monumental, que agrupa aos negocios do centro histórico, solicitoulle ao goberno local que as "terrazas provisionais" que de forma excepcional autorizou a instalar o Concello de Lugo para paliar as perdas que está a sufrir o sector da hostalería por mor das medidas para facer fronte ao covid-19 sexan prorrogadas polo menos ata o 31 de xaneiro. Este colectivo recorda que as terrazas instaladas na vía pública "son o único recurso que pode salvar a moitos negocios de hostalería da cidade", polo que reclama que a súa duración se prorrogue automaticamente coa dos Expedientes de Regulación de Emprego".
"Unha das medidas máis efectivas para axudar á hostalería a sobrevivir economicamente á situación actual foi
Na mesma liña, Latorre recordou que esa medida "excepcional" está vixente "ata o próximo día 1 de novembro", pero "o inverno que se aveciña non permite ser optimistas", polo que Lugo Monumental pide "que se amplíe esta medida ata, polo menos, o próximo 31 de xaneiro, data en que tamén finalizan os expedientes de regulación de emprego que o Goberno de España prorrogou".
"Entendemos que o Goberno fixo esa prórroga porque teñen unha estimación dos efectos económicos da pandemia a medio prazo e polo tanto parece unha data obxectiva á que estender os efectos da medida aprobada polo Concello", engade. Da mesma forma, afirma que "sería interesante estender automaticamente esa medida se se producen futuras prórrogas dos expedientes de regulación de emprego, que son actualmente uns prazos coñecidos por todos e moi publicitados pola prensa de todos os ámbitos".
Así mesmo, a asociación solicita tamén que se permita "a instalación de paraugas, toldos provisionais e demais elementos para protexer aos clientes da choiva, sempre que non supoñan o peche total do espazo".
