O colectivo Lugo Monumental, que agrupa os negocios do centro histórico da cidade, denunciou "o desfasamento" da web oficial da praza de abastos da capital lucense, porque a información que contén sobre o recinto non foi actualizada desde "o ano 2013".
Segundo asegura este colectivo, a web recolle información sobre máis de 15 postos de venda que hoxe non existen, pero non inclúe os datos de polo menos 5 que si están a funcionar, e o mesmo sucede "coa sección do mercado". Por outra banda, os planos da praza e o mercado de abastos da cidade non son os actuais, senón os de ambos os edificios "antes das reformas", polo que "nin a distribución nin o número e localización dos postos é a mesma".
Ademais, a "tenda en liña segue ofrecendo produtos de postos pechados desde hai anos" e "non é posible completar compras en ningún posto". Para rematar, Lugo Monumental precisa que "a día de hoxe" aínda non recibiu "contestación ao seu ofrecemento para xestionar a web sen custo".
