O Tribunal Supremo non admitiu a trámite o recurso presentado por Investimentos Malleo contra a sentenza emitida polo Tribunal Superior de Xustiza de Galicia o 19 de outubro de 2017, na que desestimaba a reclamación patrimonial formulada por Investimentos Malleo por un importe de 3,5 millóns de euros, por mor da restrición da edificabilidade no solar número 25 da Avenida Doutor García Portela.
Esta promotora, que pretendía construír un edificio de sete plantas de vivendas no solar que agora ocupa unha caseta de planta baixa, antigamente propiedade de Telefónica, consideraba que o Concello de Lugo prexudicara os seus intereses ao restrinxir a edificabilidade desa parcela no Plan Xeral de Ordenación Municipal.
Dáse a circunstancia de que o solar que provocou o litixio está a poucos metros da polémica urbanización do Garañón e das dúas torres sobre as que pesan polo menos dúas sentenzas que obrigan á súa demolición.
A vella caseta de Telefónica tamén está situada á beira do antigo Sanatorio García Portela, agora restaurado para abrir no verán como nova sede do Instituto Nacional de Estadística en Lugo.