O aparcadoiro público e gratuíto habilitado polo Concello de Lugo nas inmediacións do Hospital Universitario Lucus Augusti (Hula), e que colectivos como Facua cualificaron como "un perigo" para os coches e para as persoas, será obxecto de obras de mellora apenas un ano logo da súa inauguración como consecuencia do mal estado no que se atopa.
Coñecido popularmente como o leirapárking, o aparcadoiro público está cheo de fochas e fochancas que dificultan a circulación, e as prazas de estacionamento non foron delimitadas o que moitas veces provoca atascos, ao non permitir uns coches a saída e entrada doutros.
O tenente de alcalde, Rubén Arroxo, anunciou que será obxecto de obras de mellora nas próximas tres semanas, un tempo no que se intentarán evitar" as molestias aos usuarios. "A día de hoxe, debido a que ese terreo está afectado polo 5% do Plan Xeral sen aprobar, non é posible asfaltar" o aparcadoiro, explicou Rubén Arroxo, pero si se colocará unha "capa de zahorra que permitirá a drenaxe da auga e evitará que se formen fochancas e barro".
Así mesmo, delimitarase unha zona de paso, con zahorras de cores diferentes, para evitar que haxa atascos provocados por vehículos mal estacionados.
