A alcaldesa de Lugo, Lara Méndez, e o presidente da Confederación Hidrográfica Miño-Sil (CHMS), José Antonio Quiroga, asinaron este venres o convenio de colaboración para atallar as crecidas do río Rato e desbloquear, dese modo, a execución do chamado Plan Paradai, 21 anos despois do acordo coa Xunta de Galicia para unir ese barrio co das Gándaras.
O documento asinado este venres recolle as actuacións necesarias para “seguir avanzando no desenvolvemento dos barrios das Gándaras e Paradai, 21 anos logo de comprometer a súa unión coa Xunta de Galicia”, explicou a alcaldesa, ao reducir “o risco de inundación durante as crecidas do río Intre”.
O investimento total para a execución das obras estímase ao redor de 650.000 euros e a CHMS achegará 487.500 euros, o que supón unha porcentaxe do 75%, mentres que o Concello de Lugo achegará o 25% restante -162.500 euros-.
“O desenvolvemento urbanístico da zona era unha débeda pendente cos seus veciños”, debido a que a situación actual supuxo “un freo ás comunicacións e ao crecemento sostible da cidade”, concluíu a alcaldesa.
