Os casos activos descenden por terceiro día consecutivo na provincia. Segundo os datos ofrecidos este mércores polo Sergas, Lugo conta con 2.212 persoas enfermas con covid, 45 menos das que había o martes e 71 menos das rexistradas o luns, o que confirma unha tendencia á baixa e a posible saída da quinta onda.
O descenso tamén afecta o ritmo de contagios. Nas últimas 24 horas detectáronse 78 novos positivos por PCR, polos 103 detectados o martes ou os 128 do luns.
Todos estes datos positivos trasládanse á presión asistencial. Actualmente hai 37 persoas hospitalizadas con coronavirus na provincia, seis menos que na xornada anterior. Deles, 33 (seis menos) están en planta –21 no Hula, dez na Mariña e dous en Monforte–, mentres que catro (os mesmos) están na Uci do Hula.
Desde o inicio da pandemia curáronse 14.242 persoas e morreron 230, a última delas a dunha muller de 74 anos que faleceu no Hula. O Sergas, iso si, só contabiliza 222 falecidos ao non sumar algúns decesos de lucenses que se produciron noutras áreas sanitarias.
