sábado. 06.06.2020 |
El tiempo
sábado. 06.06.2020
El tiempo

Lugo, ata os topes por Reis

O animado ambiente deste venres na Rúa da Raíña de Lugo. XESÚS PONTE
O animado ambiente deste venres na Rúa da Raíña de Lugo. XESÚS PONTE
Os comercios énchense polos preparativos da festa e o tráfico da cidade reséntese. O Concello decide abrir o domingo a Praza e o Mercado para facilitar as compras no centro

Tendas cheas, problemas de tráfico... Eses foron os escenarios máis habituais este venres en Lugo, onde se viviron con intensidade os preparativos para a festa de Reis.

Hai tendas que adiantaron as rebaixas e moitos comercios están cheos polas compras de última hora e porque aínda hai quen está a facer cambios tras os agasallos recibidos en Nadal. A consecuencia desa intensa vida comercial fíxose notar na circulación, que sufriu atascos a pesar da época de vacacións escolares.

Por diante quedan dous días nos que se repetirán as mesmas escenas e nos que a actividade comercial se prevé tan intensa que ata abrirán os postos do Mercado e a Praza de Abastos.

A concellaría de participación e servizos aos veciños anunciou, así, que tanto o Mercado como a Praza de Abastos abrirán ao público este domingo. A edil nacionalista Cristina López dixo que coa medida se trata de facilitar as compras de Reis, nunha aposta por apoiar o comercio local, facilitando que se poida comprar no centro da cidade, incluídos os espazos municipais.

Tanto a Praza de Abastos como o Mercado abrirán este domingo de 9.00 a 14.00 horas. "O obxectivo é que comerciantes e praceiros que teñen os seu postos nestas instalacións municipais poidan ofertar os seus produtos ata o día antes de Reis e que as persoas que desexen facer as súas compras e última hora poidan facelas tamén na Praza e no Mercado", indicou o departamento municipal que dirixe Cristina López.

Cabalgata | 'A viaxe dun soño', con 53 artistas 
Un total de 53 artistas, xunto a 24 voluntarios, participarán este domingo na cabalgata de Reis de Lugo, que incluirá oito espectáculos. As carrozas da cabalgata, titulada A viaxe dun soño, xa están listas no parque de bombeiros. 

Percorrido 
A cabalgata sairá ás 18.00 horas de Frigsa e seguirá por Monte Faro e Avenida da Coruña ata San Fernando, desde onde continuará pola Praza de Ferrol e Bolaño Ribadeneira ata Quiroga Ballesteros, Santo Domingo e Raíña, ata chegar á Praza Maior ás 19.30 horas. 

Vixilancia 
Dezaseis axentes da Policía Local, ademais de 14 efectivos de Protección Civil, unha dotación de bombeiros e persoal sanitario de Cruz Vermella velarán pola seguridade do multitudinario desfile. 

Sentido social 
A marcha tamén terá un contido social e a asociación Somos Unidos contra o Cancro formará parte do desfile cunha carroza. 

Espectáculos 
A Danza das estrelas, un baile de luz e cor guiará a cabalgata, que incluirá tamén espectáculos como A Bola Máxica, con acrobacias e circo futurista; As Cartas reais un número de cartas danzarinas animarán tamén un desfile con Carteiras de Xeo, divertidos vehículos e paxaros que sobrevoarán a marcha e picarán os presentes. Non faltarán outras atraccións e, por suposto, haberá caramelos.

Lugo, ata os topes por Reis
comentarios