A XUNTA provincial da Asociación Española Contra o Cancro (AECC) de Lugo celebra este venres o seu tradicional acto institucional do Día Mundial Contra o Cancro de Mama, na Praza Maior de Lugo, coa lectura por parte dunha paciente dun manifesto e a intervención da alcaldesa de Lugo, Lara Méndez, a presidenta do grupo El Progreso, Blanca García- Montenegro, entre outras personalidades. Dúas luvas rosas, colocados sobre unha maceta servirán como símbolo desta edición do Día Mundial Contra o Cancro de Mama. O acto conta coa colaboración de Caixa Rural Galega, Gadis, Polusa, Deputación, Aluma, Calfensa, Areal e As Termas.
A AECC e El Progreso manteñen unha estreita colaboración nas campañas de sensibilización contra o cancro de mama, que desenvolven conxuntamente desde o ano 2011.
Esta xornada reivindicativa terá tamén un importante alcance no ámbito deportivo. As xogadoras do Emevé lucirán lazos rosas no seu partido da Superliga Feminina 1 de voleibol, e o CD Lugo vestirá equipamento rosa no partido que disputará o domingo no Anxo Carro ante o Nástic de Tarragona.
Os municipios de Cervo, Burela e Foz acollen ata o domingo varias actividades organizadas pola Asociación Española contra o Cancro. A concellaría de Sanidade cervense, que dirixe Mali Méndez, organiza para este venres unha mesa redonda na casa da cultura de San Cibrao, na que participará a psicóloga da Aecc da Mariña, Carmen Rubiños, e o fisioterapeuta Aladino Fernández.
O domingo haberá unha camiñada popular, que sairá do porto ás 17.00 horas, así como unha clase de zumba na casa do mar. Os participantes poderán achegar donativos para a AECC.
A delegación local da AECC en Burela impulsou unha campaña de fotos en redes sociais para anunciar o Día Mundial Contra o Cancro de Mama. Os participantes acudiron con camisetas brancas á casa da cultura e pousaron con etiquetas como #burelacontraocancrodemama, #aeccburelacontraocancro, #contigodouacara ou #sumatealrosa.
Foz súmase á campaña cunha concentración na Praza do Concello, ás 12.00 horas. A delegación local organizará unha cea o día 27.
