A alcaldesa de Lugo, Lara Méndez, supervisou este xoves o final das obras de descontaminación do Barrio do Carme -polo que pasa o Camiño Primitivo a Santiago de Compostela-, unha actuación que foi a primeira completada grazas aos fondos europeos da estratexia Dusi.
En declaracións aos medios de comunicación, a rexedora local dixo que os membros do goberno local están "dobremente contentos", porque "é a primeira obra que se finaliza dentro da estratexia Dusi", pero tamén porque era unha actuación "tremendamente necesaria" para recuperar unha contorna de gran valor para a cidade.
De feito, a propia alcaldesa recordou que outra das actuacións previstas nesa zona da cidade é a posta en valor dos restos das cloacas da antiga Lucus Augusti.
As obras de "descontaminación" do barrio, nas que o Concello de Lugo investiu 60.000 euros, incluíron a instalación dunha bomba para evacuar as verteduras que viñan facendo ao arroio dos Hortos, e que provocaban malos cheiros no lugar, á rede xeral de saneamento da cidade.
Lara Méndez asegurou que este é o primeiro de moitos proxectos financiados con cargo ao DUSI, algún dos cales está xa moi avanzado, o que permitirá comprobar nos próximos meses os "resultados" de todo o traballo de xestión realizado no anterior mandato.
