Lugo é a cidade máis barata para realizar unha viaxe diúrna en taxi —os máis frecuentes, sobre todo agora co toque de queda— e cun desprazamento total dun quilómetro ou menos que — son gran parte dos que contabiliza o sector, en especial en urbes non demasiado extensas—. En concreto, percorrer mil metros custa 2,85 euros —suma dos 1,88 que custa a carreira mínima e os 0,97 a que se cobran dentro desta distancia—. E incluso aínda que alguén deba tomar un taxi entre medianoite e as sete da mañá —as horas comprendidas na tarifa nocturna— utilizar este servizo en Lugo segue sendo moi económico, tendo en conta que está entre as cinco con menor tarifa de España por quilómetro (3,94 euros), xunto a Pontevedra (3,73).
A cidade, que mantén conxeladas as súas tarifas de taxi respecto dun ano atrás, encarece con todo a súa tarifa a medida que a viaxe se estenda en distancia, pois o taxímetro engade 0,97 euros de día —e 1,39 se é de noite— por cada quilómetro percorrido, máis que a media das cidades españolas, o que fai que un viaxe de 5 quilómetros salga por 6,73 euros, na media nacional.
De todos os xeitos, Lugo, polo económico das viaxes curtas, sae especialmente ben parada no último informe de Facua- Consumidores en Acción sobre os prezos deste servizo en 56 cidades españolas, entre as que figuran as galegas agás Ferrol, non incluída por non alcanzar os 70.000 habitantes marcados para ser considerada urbe.
Pondo o foco na comunidade, os resultados son heteroxéneos: mentres Lugo ten a carreira mínima diúrna máis barata de España (os mencionados 1,88 euros), Santiago é a oitava máis cara do país neste apartado con 3,75 euros, contía que non varía no primeiro quilómetro percorrido. Así, partindo dun viaxe tipo de 1.000 metros entre as 7.00 e as 24.00 horas, Lugo é a máis barata con 2,85 euros, seguida de Pontevedra (3,15), Ourense (3,20), Santiago e Vigo (3,75) e A Coruña (4). A urbe herculina aproxímase así ás veciñas Oviedo e Xixón, que con 4,30 euros marcan o quilómetro percorrido máis caro do país.
VIAXES DE 5 KILÓMETROS. Tomando como referencia dunha viaxe longa —polo menos para o que se estila en Galicia— un traxecto de cinco quilómetros, e en tarifa diúrna, as tornas cambian: A Coruña pasa a ser a máis económica, con 6,60 euros, seguida de Lugo (6,73), Santiago (6,98), Vigo (7,05), Pontevedra (7,37) e Ourense, que con 7,60 figura entre as máis custosas de España.
En cambio, se a carreira ten lugar de noite, os cinco quilómetros máis caros pasan a ostentalos Santiago (9,62) e Lugo (9,50).
SUPLEMENTO POR EQUIPAXE. As diferenzas tradúcense tamén ao suplemento por portar maletas. Na Coruña hai que desembolsar 0,80 euros. A continuación, máis parellas, sitúanse Vigo (0,59), Lugo (0,56), Pontevedra (0,54), Santiago (0,50) e Ourense (0,35). A urbe herculina cobra, a maiores, 0,75 por levar mascotas.
