Lugo busca sepultureiros para reforzar o persoal do cemiterio de San Froilán

O Concello elaborará unha lista para a cobertura temporal de prazas de oficial sepultureiro, para o que este mércores aprobou as bases que rexerán o proceso de contratación. O prazo para inscribirse será de dez días naturais a partir do día seguinte á publicación do anuncio no Boletín Oficial da Provincia (BOP).

O portavoz do goberno, Miguel Fernández, explicou que o sistema de selección consistirá en dúas fases: oposición, con probas teórica e práctica, e un baremo de méritos, no que se valorará a experiencia profesional, a titulación, a formación, o coñecemento da lingua galega e a inscrición como demandante de emprego no servizo público.

O cemiterio de San Froilán abre todos os días do ano e hai anos que ten déficit de traballadores. O persoal foi reducíndose por diversas razóns, como traslados e xubilacións. Ademais, neste momento hai un oficial sepultureiro de baixa e non hai substitutos porque só hai unha lista de contratación de peóns, realizada a principios do ano pasado. Ante esta situación, o Concello decidiu elaborar unha lista de oficiais.

Actualmente, o cemiterio dispón de catro traballadores fixos (incluído o encargado) e de dous contratados. O servizo chegou a ter nove operarios.

O reforzo do persoal é unha demanda constante dos sindicatos desde hai anos, existente tamén noutros moitos servizos moi deficitarios, entre outras razóns, polas limitacións legais á contratación.