Arrinca este mércores en Lugo a primeira edición do Congreso Nacional de Turismo Experiencial, en modalidade presencial e online, cun total de 59 relatores procedentes de diferentes puntos de España, entre profesionais de referencia no sector do turismo, do lecer, da cultura, da comunicación e da mercadotecnia. Segundo os seus promotores, "o obxectivo deste evento é sentar as bases do novo turismo do século XXI, para recuperar o potencial dun dos sectores mais influentes na economía nacional".
Na inauguración deste congreso participaron, entre outras autoridades, o vicepresidente da Xunta de Galicia, Alfonso Rueda; o presidente da Deputación de Lugo, José Tomé, e a alcaldesa da capital lucense, Lara Méndez.
O presidente da Deputación Provincial destacou durante a súa intervención a aposta "decidida" da institución por "converter a provincia nun destino turístico de calidade, non masificado, de contacto respectuoso coa natureza e que resulte sostible no tempo".
Asegura que a institución provincial aposta por un "modelo" que ten que converterse nun motor de desenvolvemento económico e que contribúa ao equilibrio territorial.
Pola súa banda, Méndez recordou que Lugo xa é un "destino turístico importantísimo" e no "ano 2019 foi a provincia que máis creceu de toda Galicia" en canto ao número de visitantes, e "o turismo chega xa a niveis importantísimos" en canto á súa achega á economía local, cun "10,5% do Produto Interior Bruto" e un "11% do emprego".
Ademais, recordou que mantén "esa capacidade de seguir crecendo" porque "ten todos os elementos, todas as vimbias para vivir esa experiencia, gastronomía, riqueza patrimonial e unha parte ambiental moi importante".
Aínda que a pandemia vai a "destorcer" a propia actividade do sector, opina que tamén hai que aproveitar a oportunidade para "situar a Lugo no mapa como un destino turístico sostible, seguro e de calidade".
Pola súa banda, Alfonso Rueda fixo referencia, en declaracións aos medios de comunicación, á necesidade de estender o Xacobeo ao ano 2022. "Agora hai que incidir moito máis en facer un Xacobeo máis pegado ao territorio, implicando moito máis a todos os territorios de Galicia, mirando cara ao interior, porque o exterior parece moito máis difícil".
Pero, "ao mesmo tempo tampouco renunciar ao Xacobeo que tiñamos planificado", aínda que "para poder gozalo e aproveitalo, temos que pedir que se prolongue no tempo, pensando que as circunstancias da pandemia van mellorar" e a situación "normalizarase", insistiu.
O programa está repartido en tres "completas xornadas divididas en sete bloques temáticos e en dúas actividades complementarias (visita á Ribeira Sacra e á Mariña lucense), para falar do turismo experiencial, sostible, seguro e non masificado, unha actividade que "que achegue valor ao patrimonio cultural e natural do destino, en harmonía co territorio e co medio ambiente".
Entre este mércores e xoves, días 16 e 17 de setembro, levarán a cabo dous workshops sobre Emprendemento sostible e Creación de experiencias turísticas, que contarán coa participación dos relatores e de membros de Experiencia do Destino, entidade organizadora do Congreso, que se está celebrando na Deputación de Lugo.
A primeira xornada arrincaba cun análise "da nova realidade das comunidades autónomas derivada da crise sanitaria e económica provocada pola Covid-19", coa participación de representantes das administracións públicas e do presidente do Clúster de Turismo de Galicia, Cesáreo González.
Entre outros temas, falouse das posibilidades para pór "en común ferramentas para consolidar un modelo de turismo non masificado, respectuoso coa natureza e cos modos de vida tradicionais", así como "da necesidade de ofrecer un turismo seguro, da reactivación do turismo nacional a partir de estratexias locais, e da colaboración e as sinerxías como claves do reimpulso turístico nas comunidades".
A continuación, altos representantes de entidades sen ánimo de lucro como a Fundación Europea para a Innovación, e de empresas como Rural Talent e Escapada Rural, falaron das estratexias, ferramentas e claves de emprendemento e innovación, centradas na dinamización turística, de cara a fomentar a repoboación rural.
