LUGO. O Lugo máis ilustrado creceu ao amparo do instituto Lucus Augusti, que foi sementando un coñecemento científico e humanístico cuxo peso queda retratado no novo museo, arquivo e biblioteca histórica. O espazo, inaugurado o luns, é froito dun arduo traballo, no que se implicaron especialmente as profesoras Fernanda Marzo e María Jesús Méndez, a quen se dirixiron os aplausos máis entusiatas durante o acto de inauguración.
O director do centro, Juan Carlos Fernández Naveiro, capitaneou o proceso de posta en valor da valiosa herdanza do primeiro instituto de Galicia e o luns destacou o interese dun museo que mostra insrumentos e material que se empregaba no ensino de disciplinas como música, óptica, física, química, mecánica, zoología, botánica, anatomía ou xeoloxía, entre outras.
Naveiro resaltou apoio recibido da Xunta e de institucións tan diversas como o Arquivo Histórico Provincial, a Biblioteca Nodal, o Museo Pedagóxico de Galicia e ata o Museo do Castro de Viladonga.
A alcaldesa, Lara Méndez, a deputada de cultura, Pilar García Porto, ou o delegado da Xunta, José Manuel Balseiro, coincidiron na inauguración do novo museo e destacaron o legado do Lucus Augusti. Porto recordou o vínculo coa Deputación, en cuxa sede estivo o instituto, e Méndez recalcou o carácter de «referente» do centro, ao ser o primeiro instituto de Galicia. Subliñou que o novo museo vén reforzar o rico patrimonio que exhibe a cidade.
Balseiro, pola súa banda, afirmou que a posta en valor do legado histórico garante a preservación dun patrimonio importante e subliñou que a colección mostra ás claras as razóns polas que o centro lucense é membro de pleno dereito da Rede de Institutos Históricos de España.
Destacou o apoio de Educación ao proxecto. A Consellería achegou uns 97.000 euros para o proxecto de musealización e a retirada dos escudos do centro e o delegado da Xunta defendeu a implicación no proceso da xefa territorial, Carmen Gueimonde.
A musealización permitiu rescatar fondos que se conservaban en condicións precarias, que puñan en perigo a súa preservación para o futuro. Agora, a idea é que ese espazo dedicado á memoria da educación póidase visitar. Pero o museo non abrirá ao público no prazo inmediato, xa que hai que establecer normas de acceso que este curso non dá tempo xa a elaborar, indicou o director do Lucus Augusti.
LIBROS DO REXISTRO
Consérvanse os datos dos alumnos, as súas localidades de orixe e as notas que alcanzaron no seu paso polo instituto
VISITAS
O museo non se abre aínda ao público, xa a elaborar os protocolos de acceso
No momento no que se abra, o público e os estudiosos terán acceso a unha herdanza singular, que inclúe importantes xoias bibliográficas, algunha incluso do século XVI.
A visita permite tamén coñecer os libros de rexistro de profesores e alumnos, que constitúen igualmente toda unha lección de historia. E é que os libros permiten ir percorrendo os lugares de orixe dos alumnos, que chegaban de toda a provincia, e as cualificacións que alcanzaban en cada materia, un dato relevante tendo en conta, sobre todo, que polas aulas desfilaron figuran que tiveron despois unha gran proxección pública. Igual ocorre cos profesores, xa que o centro foi lugar de traballo de moitos personaxes con peso na Galicia dos últimos 175 anos.
