Lucía Díez Ferreiro e Nara López Rey xa gozan dos seus premios como primeira e segunda clasificada, respectivamente, no concurso infantil San Froilán de debuxo. Ambas recibiron as súas recompensas este luns pola tarde na sede o El Progreso, organizador deste galardón xunto coa concellaría de cultura do Concello de Lugo.
A responsable desta área, a concelleira Maite Ferreiro, foi a encargada de entregar á gañadora, Lucía Díez, o vale pola Play Station 5 que se gañou coa súa creación ao redor da relación do polbo coa capital lucense e as súas festas maiores de outono. Lucía, de 12 anos e actualmente estudante do IES Xoán Montes, foi elixida como a mellor de todos os aspirantes ao premio por un debuxo que con sentido do humor, colorido e optimismo o produto estrela do San Froilán, a muralla e a pandemia de coronavirus que converteu os festexos deste ano nos máis peculiares da historia. No seu traballo, Lucía Díez presenta un polbo feliz que dá as grazas ao coronavirus cun "¡Este ano libro!".
Nara López, polo seu lado, recibiu de mans do director comercial de El Progreso, José María Álvarez Vilabrille, o vale que pode trocar por unha tablet, o segundo premio do concurso. Alumna da Rosalía de Castro, os seus nove anos non foron límite para que a súa imaxinación proxectase un debuxo no que a muralla e o polbo estalan en cor para render homenaxe á música e a cultura tradicional que tamén son tan características das patronais lucenses. Deste xeito, converteu aos polbos en alegres músicos galegos de pasarúas pola Mosqueira.
SETENTA PARTICIPANTES. Lucía e Nara foron as elixidas entre máis de setenta escolares de entre 8 e 14 anos que se presentaron ao premio. Ningunha das dúas, con todo, encarou a participación como un traballo escolar, senón pola súa conta e tras decatarse fóra dos seus centros educativos da existencia desta iniciativa.
O xurado do concurso valorara no seu momento a alta participación que mantivo pese ao momento, ao destacar que os concursantes "en tempos complicados, transmitiron cor e positivismo ás festas patronais de Lugo".
Neste sentido, os membros do xurado valoraron especialmente "a vinculación do polbo coa capital lucense, o uso de cores rechamantes, a calidade no trazado e a imaxinación demostrada por todos".
