Entrar nun aparcadoiro municipal e acabar tendo que saír porque non é posible aparcar ten prezo en Lugo. En concreto, A.V. tivo que pagar 35 céntimos para poder abandonar do estacionamento da Praza da Constitución tras pasar dez minutos no interior intentando aparcar, infructuosamente.
A muller probou a aparcar en dúas prazas distintas, pero unha vez colocado o coche comprobou que abrir a porta do vehículo era imposible nos dous casos. "Salvo que fixese un buraco no teito, non tiña forma de saír", explica.
A afectada contou o seu caso este xoves, logo de presentar unha reclamación ao Concello, xa que entende que, como propietario, tería que asegurar que haxa prazas cun ancho suficiente para aparcar ou, garantir que non hai que pagar cando é imposible aparcar.
A muller entrou en dúas prazas, pero eran estreitas e non podía saír do coche e, tras dez minutos, renunciou a aparcar alí
A reclamación acaba de presentarse, pero o episodio tivo lugar xa o pasado 3 de outubro e acabou coa muller provocando un atasco na saída do aparcadoiro.
Así, este xoves contaba que, tras dez minutos intentando aparcar e vendo que ía acabar chegando tarde a traballar, optou por irse do aparcadoiro. Pero na porta negábanse a abrirlle a barreira se non pagaba. "Ao final, o vixiante fixo unha chamada e alguén lle dixo que non me podía deixar saír se non pagaba antes". A muller pagou, pero decidiu denunciar unha situación que considera incomprensible.
Recoñece que dentro había coches aparcados, aínda que a maioría ocupaban máis dunha praza, porque o tamaño dunha non chega para meter un vehículo e ademais poder saír despois do coche, di.
A empresa alegou que a muller tivo que pagar porque fixo uso das instalacións e había prazas libres para aparcar e ela renunciou a facelo.
O exiguo tamaño das prazas provoca problemas de forma constante e outro dos condutores que o comprobou recentemente foi un coruñés que este San Froilán acudiu a Lugo a unha comida con amigos e, polos seus problemas de mobilidade, decidiu entrar ao aparcadoiro de Santo Domingo. Logrou estacionar, pero ao ir retirar o coche atopouse con que non podía entrar ao vehículo porque tiña outro aparcado á beira e non había espazo. Ao final, un amigo con mellores condicións físicas logrou entrar ao vehículo e sacalo. Pero a aventura non acabou aí, ao retirar o coche o visitante coruñés atopouse con que o vehículo tiña uns raións importantes, que atribuíu a que alguén que debeu ter problemas para aparcar.
Unha turista acaba de escribir ao Concello alertando da mala imaxe que dá cuns aparcadoiros "que non están para nada á altura da cidade".
