O investigador lucense Carlos Coroas recibiu o segundo premio Math-in grazas a un modelo que determina a dureza das pezas de aceiro no sector da automoción. O primeiro premio recaeu en Alfredo Ríos pola súa contribución á mellora dos dispositivos de almacenamento de enerxía eléctrica.
Carlos Coroas, do departamento de Matemática Aplicada da Universidade de Vigo, centrou o seu traballo de fin de máster no modelado e simulación numérica do tratamento térmico de arrefriado e a súa aplicación ao arrefriado industrial, en particular ao sector da automoción.
Neste traballo analizou procesos industriais que levan a cabo na empresa ourensá CIE Galfor, dedicada á fabricación de pezas de aceiro para vehículos. A ferramenta creada por Coroas permite obter resultados de como van quedar as pezas.
Coroas analizou procesos industriais na empresa ourensá CIE Galfor, dedicada á fabricación de pezas para automóbiles
O primeiro premio foi para Alfredo Ríos, do departamento de Matemática Industrial da Universidade de Santiago, que estudou os dispositivos de almacenamento de enerxía eléctrica, que son importantes para baterías de teléfonos móbiles ou para vehículos eléctricos.
"é necesario que existan mecanismos que se encarguen de limitar o uso da batería cando o usuario a emprega de forma incorrecta", indicou Ríos.
Os premios Math-in son outorgados pola Rede Española Matemática-Industria e o Instituto Tecnolóxico de Matemática Industrial a proxectos fin de máster no campo da Matemática Industrial. Estes galardóns recoñecen a novidade e contribución dos traballos neste ámbito das matemáticas, a tecnoloxía xerada nos mesmos, o desenvolvemento e uso de novas ferramentas matemáticas.
