O mundo vive un deses períodos onde un xiro precipitado dos acontecementos debuxa un panorama económico só apto para o enxeño empresarial máis audaz. Fernando García é propietario dun amplo local comercial na Ronda da Muralla e lanzou unha idea insólita ata agora: alúgao por un euro. Iso si, ese é o prezo para o primeiro ano.
Sobre o seu escaparate colga un anuncio que detalla que a persoa que mostre o seu interese por alugar este espazo para fins comerciais poderá facelo se abona unha renda dun euro ao mes durante o primeiro ano de contrato. "A persoa que asine o contrato de aluguer deberá facelo polos próximos 5 anos. O primeiro ano pagará un euro de aluguer simbólico e a partir do segundo ano o prezo do aluguer é dun valor de mercado", asegura o seu propietario, Fernando García Díaz.
Ademais, a persoa que o alugue deberá depositar unha fianza dun ano de aluguer ou un aval bancario por idéntica cantidade. "Queremos que quede claro que non hai gato encerrado. O arrendatario non pagará de máis os seguintes catro anos de aluguer por depositar só un euro ao mes durante os primeiros 12 meses de contrato", manifesta.
Esta iniciativa tivo un gran eco desde que o propietario puxo o cartel na Ronda e lanzouna en Facebook. "A verdade é que desde que publicamos o aluguer do local a chamada non cesaron. Tanto é así que xa estamos en conversacións para pechar o contrato proximamente", asegura.
O céntrico inmoble lucense albergou durante anos a delegación de Facenda, e máis tarde converteuse na sede provisional de Correos
Este espazo comercial componse de tres plantas cunha superficie total de 550 metros cadrados. "É un espazo diáfano con moita luz natural. Sería ideal para unha clínica dental ou centro de beleza, ou incluso para un despacho profesional de avogados, de enxeñeiros ou para a apertura dunha sucursal bancaria ou unha oficina dalgunha compañía aseguradora", recalca o seu propietario.
O céntrico inmoble lucense albergou durante anos a delegación de Facenda, e máis tarde converteuse na sede provisional de Correos mentres se remodelaban a oficina central da Rúa San Pedro. "Aínda que leva 10 anos sen inquilinos está totalmente acondicionado desde o 2019. Con este aluguer decidimos achegar o noso granito de area na reconstrución comercial da nosa cidade", conclúe Fernando García para explicar a súa idea.
