Se hai catro anos o salón de plenos do Concello de Lugo quedou pequeno para vivir a investidura da primeira alcaldesa da cidade e recibir a novos grupos políticos que entraban en escena, e a cerimonia foi un sube e baixa de emocións pola abrupta marcha de José López Orozco, a segunda toma de posesión de Lara Méndez xerou moita menos expectación. A coincidencia co Arde Lucus tampouco se percibiu apenas, salvo polos tambores que soaban ao exterior e a vestimenta romana de Carmen Basadre, alma máter da festa, como recorda Méndez cada vez que ten ocasión. Aínda que desde o venres xa non é concelleira, estivo pendente da festa todo o tempo.
Entre os invitados había quen esperaba atoparse a Méndez vestida pouco menos que de emperatriz para recibir por segunda vez o bastón de mando da cidade, pero a socialista optou por un vestido negro con ribetes en cru porque, ao parecer, non todos os membros do seu novo equipo se sentían cómodos caracterizándose de época. Fronte á etiqueta que lucían a maioría dos concelleiros contrastaba o look de quen será primeiro tenente de alcalde e dalgúns dos seus compañeiros. O nacionalista Rubén Arroxo non renunciou aos texanos, a camisa de cadros e as deportivas.
Se algunha emoción se percibiu na sesión foi a dos concelleiros novos (17), maior, como é lóxico, entre quen formarán parte do goberno. Moitos estiveron acompañados por pais, parellas e fillos, como os vinteañeiros da nacionalista Maite Ferreiro e a socialista Paula Alvarellos ou o pequeno e risueño Darío, fillo da portavoz de Cs, Olga Louzao.
A propia Méndez contou coa presenza do seu marido, Ángel, e da súa filla, Marcela, que a pesar de que leva tempo dicindo que quere votar para que "mamá non sexa alcaldesa", viviu con resignación e paciencia a monótona investidura, ata que esta acabou e colgou do pescozo da súa nai coa intención de retela o maior tempo posible. Hai catro anos, a nena seguiu o acto en brazos do seu pai e este sábado, nunha cadeira en sitio preferente, e só cando, ao finalizar o discurso, a súa nai se referiu a ela para sinalar que, a pesar da súa curta idade, xa lle ensinou que o esforzo, o tesón e a loita sempre dan froitos, asomou emoción na súa voz. Méndez tamén estivo acompañada polos seus sogros e os seus pais, "contentos", "orgullosos" e confiados en que teña catro anos un pouco máis fáciles que os anteriores.
Basadre, Rosana Rielo e Ana Prieto, xa en calidade de deputada nacional, foron os únicos exconcelleiros do goberno que acudiron ao acto, que contou coa presenza da subdelegada do Goberno, Isabel Rodríguez; o presidente en funcións da Deputación, Darío Campos, que ao mediodía tomou posesión como alcalde da Pontenova, e os deputados autonómicos e exconcelleiros Concepción Burgo e Luis Álvarez. Os edís do PP estiveron acompañados polo delegado da Xunta en Lugo, José Manuel Balseiro, e os nacionalistas, pola deputada autonómica Olalla Rodil, e por veteranos como Cosme Pombo, Suso Méndez e Antón Bao, que gobernou con Orozco e que este sábado recoñecía que foi consultado polos seus compañeiros nas negociacións con Méndez.
Como en todo acto político, houbo apartes, como o de Campos e o novo edil e secretario provincial do PSOE, Álvaro Santos, quen mostrou moita présa por saír tomar un café e tivo que ser reclamado polos seus compañeiros para facer a foto do novo grupo socialista.