O Vello Cárcere celebra a próxima semana o seu primeiro ano como centro cultural e para o aniversario convocouse, o martes, ao escritor Lorenzo Silva.
Os actos arrincan o domingo, cando se proxectará, ás doce, un vídeo-exposición de forma que cada cela converterase nunha fiestra. Será unha homenaxe aos trece artistas da tripla mostra interdisciplinar. Posteriormente, á unha, se visionarán catro vídeos que, baixo o título de Vivencias, recordarán as historias dos familiares de presos que estiveron no centro. Nel participarán José Luis Mundiña Pozas, Manuel Cuesta, Rafael Pérez de Veiga e Claudio Rodríguez Fer.
Ademais, o Concello programou un ciclo de cine arqueolóxico, que comezará tamén o domingo, ás sete, co filme El arte breve: el cirujano de Ariminun. Esta actividade continuará o domingo seguinte, á mesma hora, co documental La Pompeya británica de la Edad de Bronce. A terceira proxección será o día 26, ás oito e media, e tratarase dun curto sobre un poboado cántabro da Idade de Ferro, La visita de Plentio, e do videoclip El llanto del Lábaro, que explica a historia das guerras cántabras. A última proxección, La tumba de Genghis Khan, el secreto desvelado, será o 3 de xuño, ás sete.
