A conselleira de Emprego e Igualdade, María Jesús Lorenzana, reivindicou ante os empresarios de Lugo o compromiso da Xunta para a reactivación cun orzamento "histórico" para 2021 e o plan para traballadores autónomos e microempresas.
Acompañada do delegado territorial en Lugo, Javier Arias, mantivo un encontro coa directiva da Confederación de Empresarios de Lugo (CEL) para avanzar nos proxectos que a Xunta impulsa para a reactivación económica e referendar o seu compromiso co tecido produtivo mediante un orzamento de 11.563 millóns de euros. Tamén coa activación das liñas de axuda dotadas con 84 millóns de euros para axudar a persoas autónomas, microempresas e, en especial, ao sector da hostalería.
Ante os representantes da CEL, Eduardo Valín e Jaime López, conselleiro delegado e secretario xeral da entidade respectivamente, Lorenzana destacou a relevancia que o plan de rescate para autónomos, microempresas e sector da hostalería terá para os empresarios desta provincia "do que por suposto poderán beneficiarse os asociados da CEL e sectores afectados polas consecuencias da pandemia", dixo. O plan, engadiu a conselleira, "está dotado con 84 millóns e caracterizado pola accesibilidade dos seus requisitos e a axilidade á hora de tramitar as axudas".