Axentes da Policía Local de Lugo localizaron e auxiliaron a un home que se atopaba tirado no chan dunha leira da capital, semiespido e sen poder articular palabra. Os feitos sucederon o pasado día 9, sobre as nove e media da noite, cando unha patrulla se desprazou ata a rúa Monte Pena Loura, na Residencia, tras rexistrar diversas chamadas á Sala do 092, nas que varios veciños sinalaban que se escoitaban berros estraños.
Tal e como confirmou o luns o portavoz policial, os axentes acudiron de inmediato ao lugar e observaron que había un home nun solar tirado contra un muro, "coa mirada fixa pero sen poder falar nin expresarse, emitindo soamente berros e queixumes". Os policías solicitaron a intervención dunha ambulancia e prestáronlle auxilio ao home mentres esperaban a chegada dos sanitarios, "tapándoo e dándolle calor, ao mesmo tempo que o tranquilizaban". Deste xeito, os axentes da orde lograron que se fose recuperando aos poucos.
DOENZA. Cando chegou a Policía Local, o home estaba semidesnudo, pero os axentes atoparon roupa nun alpendre próximo e puxéronlla. Segundo puideron pescudar os policías, esta persoa acudira á leira -que se atopaba á beira da súa vivenda- para darlle para comer aos seus animais. Ao parecer, o home empezou a cambiarse de roupa, pero atopouse mal de forma repentina e acabou tirado no chan, contra o muro da leira. Segundo sinalou o portavoz da Policía Local, "o home, de 54 anos, é diabético, polo que sofre bruscas baixadas de azucre".
Finalmente, o lucense puido subir á ambulancia polo seu propio pé e foi trasladado ao Hula para recibir asistencia médica.