O Grupo Leche Río -que conta con catro plantas: Ceao I e II, en Lugo; Veiga de Anzós, en Láncara, e Arteixo, na Coruña- pechou o exercicio pasado cuns beneficios de case catro millóns de euros. A súa facturación roldou os 135 millóns en 2018. Estas contas acaban de ser aprobadas polo consello de administración da súa matriz, Lence Torres.
Esta sociedade lucense, a máis importante de capital galego do sector lácteo, segue apostando decididamente pola súa terra. Entre este ano e o
Na de Leyma de Arteixo instalou unha nova liña de envasado de leite fresco e nas do polígono industrial do Ceao montará un almacén automático, nunha, e unha nova liña de envasado en botella, na outra. Estes son proxectos que xa deixou encamiñados o fundador do grupo, Jesús Lence, falecido en abril.
Esta é a segunda sociedade do municipio de Lugo en facturación, por detrás da multinacional francesa Lactalis, e a de capital galego que máis leite recolle en toda a comunidade, 800.000 litros diarios, -as catro que lle preceden son foráneas-.
RELEVANCIA. A consultora de xestión de datos DataCentric recolle nun estudo que o Grupo Leche Río é "o máis relevante" na provincia de Lugo, tanto polo seu volume de facturación e de emprego como pola súa reputación e os seus valores identitarios.
"Leche Río é a primeira empresa galega de recollida en Galicia. Todo o noso leite procede de gandeiros galegos e transformámola toda en Galicia, polo que o valor engadido queda aquí", destaca a nova presidenta do consello de administración de Lence Torres, Carmen Lence, que colleu as rendas do hólding tras o falecemento do seu pai.
Esta executiva, que residía en Boston (Estados Unidos) coa súa familia, defende o papel que xoga este grupo no sector primario. "Sería unha pena que Galicia, que é a principal produtora de España, só servise a empresas de fóra", di Carmen Lence, que engade que "non podemos permitir que iso suceda porque o 75% do leite que se recolle en Galicia xa se transforma fóra, co que o valor engadido marche", precisa.
Destaca tamén "a estabilidade que achega ao campo" porque "somos a empresa que estamos a pagar máis aos gandeiros, e xa levamos catro anos, e porque temos contratos anuais".
CONTINUIDADE. Carmen Lence, que estes días visitaba granxas, garante a continuidade desta empresa familiar, inmersa nun "período de transición".
"O meu pai tíñao clarísimo. Se quixese vender a empresa, sobráronlle oportunidades. Pero el cría na empresa e cría en Galicia. Eu creo, como el, que Galicia necesita ter unha empresa láctea de capital galego ao 100% e que iso se debe coidar e manter", puntualiza.
Facturou case 135 millóns de euros en 2018 e prvé investir entre leste e o próximo ano 10 millóns en mellorar as súas instalacións
Esta executiva destaca o músculo do Grupo Leche Río nun sector tan competitivo, poboado de multinacionais. "É unha empresa que ten moi boa reputación no mercado e moita experiencia. Contamos con traballadores que senten a empresa coma se fose súa, porque eles contribuíron a construíla. É unha empresa solvente, que non ten ningún crédito, e que está a gañar diñeiro", asegura.
"Coraxe, perseveranza e mentalidade emprendedora" son, ao seu xuízo, os valores que definen a esta empresa. Recorda que o seu pai dicía: "Non te preocupes, ocúpache, segue crecendo, vendo as oportunidades que che ofrece o mercado, escoitando a clientes, gandeiros, provedores... e intenta dar o mellor para seguir sendo relevantes".
Asegura que a súa forma de xestión é "un pouco diferente" porque "pertenzo a unha nova xeración e cun novo xeito de pensar como é o liderado da empresa, máis colaborativo, -o meu pai era máis autocrático-".
