Lara Méndez quere que Lugo teña un turismo sostible. Para iso, o seu proxecto Vivamos Lugo inclúe a elaboración dun plan estratéxico de turismo, coa participación de todos os axentes implicados. O obxectivo é darlle un novo impulso a este sector económico estratéxico cunha redución do impacto que poidan ter sobre o medio ambiente e a cidade os efectos deteriorantes do turismo masivo.
Esta iniciativa foi unha das que presentou este martes a candidata socialista aos comerciantes e hostaleiros. Lara Méndez explicoulles que o turismo é unha área que considera transversal na súa xestión, "porque vai vinculada coa cultura, o noso rico patrimonio natural e inmaterial así como coa nosa riqueza natural".
UNESCO. Un dos seus obxectivos é que o centro histórico lucense consiga o recoñecemento por parte da Unesco de Patrimonio da Humanidade.
A alcaldesa explicou que pretende converter Lugo nunha parada obrigatoria dos pasaxeiros de cruceiros internacionais, así como potenciar o pasado romano da cidade. A el vincularanse as caldas que se construirán a beiras do Miño.
Co obxectivo de atraer turistas, seguiranse potenciando, ademais, as tres grandes citas festivas de Lugo: o San Froilán, o Arde Lucus e o Caudal Fest.
A alcaldesa presentou outras iniciativas innovadoras, como as Rutas da Choiva no Rato e no Miño con zonas cubertas dedicadas a escoitar "a choiva e desfrutar da terra mollada".
Desenvolverá, ademais, un progama de promoción do Camiño Primitivo como ben mundial de cara ao Xacobeo 2021.
VOTO ÚTIL. A alcaldesa aproveitou o acto deste martes para advertir aos hostaleiros e comerciantes de que para pór en marcha estas iniciativas necesítase un Goberno con estabilidade e cunha maioría que permita aprobar os orzamentos, "porque sen eles non hai investimentos", recordou.
Neste sentido, Méndez dixo que "Lugo ten moitos retos por diante, como o impulso do turismo ou finalizar a execución dos tres programas europeos que acadamos neste mandato, con 23 millóns de investimento e cun prazo de execución de 2023". Insistiu en que para levalos a cabo, necesítase a aprobación de orzamentos, "o que este mandato non tivemos, porque a oposición non levantou a man nos plenos para que Lugo avanzase", afirmou.
