Lara Méndez cre que o galego necesita unha "discriminación positiva"

A alcaldesa de Lugo, Lara Méndez, anunciou que o Concello recorrerá a sentenza do Tribunal Superior de Xustiza de Galicia (TSXG) que anula parte da ordenanza municipal do galego, porque "entendemos que foi un acordo unánime, en defensa do galego", remarcou a rexedora, que recordou que foi un pleno en 2012 o que aprobou esta norma por unanimidade, cos votos de PSOE, BNG e PP. Lara Méndez admitiu que á luz do fallo -que anula en parte ou totalmente 13 dos 26 artigos da normativa tras ser recorrida pola asociación Galicia Bilingüe- "pode entenderse que hai unha discriminación positiva cara ao galego". Con todo, recordou que "cando un trata de corrixir unha desigualdade é cando fai esa discriminación positiva, como se fai noutras vertentes".

Así, a rexedora apoiou esa "discriminación positiva", porque di que os datos así o reflicten e confirman que tres de cada catro nenos son castelán parlantes e a maioría dos que falan en galego son maiores de cincuenta anos. "Vaise cara unha progresión de envellecemento do idioma que hai que intentar evitar con medidas correctivas para paliar esta situación", comentou Méndez, quen defendeu o bilingüismo, aínda que alegou que un deses idiomas está "en detrimento do outro e ese é o galego e non o castelán, como insinúa algunha forza política", comentou.

O grupo municipal de Lugonovo tamén reaccionou ante a sentenza do TSXG instando o goberno local a loitar para non dar pasos atrás na defensa do galego. Esta formación, que apoia o recurso ante o Supremo contra o fallo que pretende presentar o executivo, tamén apostou por impulsar unha declaración institucional e pola convocatoria dunha concentración diante do concello en defensa do galego.

Mentres, o grupo do BNG explicou que instou á alcaldesa a convocar unha xunta de portavoces para analizar o contido da sentenza do TSXG, xa que considera que, ao haberse aprobado a ordenanza do galego por unanimidade, "a corporación ten que actuar de xeito conxunto". Ademais, este grupo considera que se trata dunha norma "aberta" e que "respecta as liberdades individuais de uso do idioma".