Lara Méndez traballará para evitar que peche o párking de Ánxel Fole

A alcaldesa de Lugo, Lara Méndez, recoñeceu que o escenario que se abre "é complexo" ante o peche do aparcadoiro Ánxel Fole, no centro, por falta de licenza de apertura. Respecto diso, recordou que "a licenza de actividade está denegada desde 2009, e a pesar diso séguese traballando para prolongar os prazos o máximo posible para que haxa un acordo entre partes".

Méndez puxo de relevo que se segue coas negociacións "para ver posibles solucións, e para traballar para darlle unha solución". "Pero nós temos que cumprir coa legalidade", matizou. "Dentro deses prazos e marxes legais seguimos traballando", engadiu, en relación á súa vontade de evitar o peche. Este aparcadoiro é dos máis relevantes do centro, con prazas en superficie, e dá servizo a máis de 1.100 coches de forma diaria.

As declaracións da rexedora producíronse na inauguración de Diversiarte, "un preludio do Nadal", na parte de atrás do consistorio, onde se instalan artesáns, baixo unha carpa, e que permanecerán aí durante tres días.