Aos tesouros pedagóxicos que custodia o instituto Lucus Augusti únese desde este mércores unha lámina da táboa periódica de Mendeléyev de finais do século XIX e que formaba parte da valiosa colección educativa do primeiro instituto de Galicia.
A lámina deuse por perdida, pero en 2014 un profesor atopouna e recoñeceu inmediatamente o seu valor. Púxose en marcha un proceso de restauración, que levou a cabo o Museo Pedagóxico de Galicia (Mupega), que agora a devolveu para que pase a engrosar a colección do centro, explica Carmen Correa
O valor da lámina corresponde a que a táboa de Mendeléyev é a primeira na que os elementos "quedaron colocados tal como os coñecemos hoxe en día", explicaba Carmen Correa.
A lámina, agora enmarcada, quedará no museo do instituto, cuxa apertura ao público prevese que se aborde xa a curto prazo, segundo a vicedirectora. As visitas, iso si, serán previa cita.
O museo completouse hai xa tempo, aínda que se seguirán incorporando novas pezas. A súa colección ten grande interese polo carácter histórico do instituto.
Coincidindo coa presentación da lámina, o centro organizou este mércores unha conferencia do profesor Manuel Bermejo Patiño sobre a táboa periódica.