A secretaria de Palas di que espera xustiza e que gañou 19 contenciosos

A secretaria titular do Concello de Palas de Rei, Celia González, recordou este martes ás portas da Audiencia Provincial de Lugo que gañou dezanove contenciosos nos últimos sete anos a causa do suposto acoso laboral ao que se viu sometida, entre outros, polo actual alcalde e o ex rexedor, Pablo Taboada e Fernando Pensado, respectivamente.

Ambos os mandatarios sentaron este martes no banco dos acusados da Audiencia Provincial, xunto con outras nove persoas -entre concelleiras e funcionarios-, para responder polos supostos delitos de prevaricación e acoso no traballo, por mor da denuncia que interpuxo contra eles a propia secretaria. "É un momento para deixar actuar á Xustiza, para que por fin se peche un capítulo durísimo, de sete anos. Benvido sexa o xuízo, que se resolva, que se pechen sete anos moi difíciles, moi complicados e moi duros da miña vida", dixo Celia González.

A funcionaria precisou que ela estivo "traballando sempre" no Concello de Palas de Rei, onde ten a súa praza. "Estiven traballando sempre. Abríronme seis expedientes disciplinarios, estiven suspendida provisionalmente de emprego e soldo, pero despois de dezanove contenciosos administrativos, nos que todos me deron a razón, sigo sendo secretaria titular da praza", precisou.

Recordou, así mesmo, que esta situación obrigouna "a estar de baixa", a "última vez" durante "catorce meses", pero "agora mesmo" está "de alta laboral e traballando no Concello de Palas".

Recoñeceu que a resolución deste xuízo é unha "cuestión superimportante" para ela mesma e para "a súa familia", porque confía en que a Xustiza lle dea a razón e continuar "traballando no Concello de Palas", pero "noutras condicións". "Estou coa ilusión de que despois dun proceso larguísimo, no que sufrimos todos moitísimo, por fin isto se resolva. Véxoo como o final dun longo camiño", concluíu.