A nube de fume e o cheiro a queimado que a partir do mediodía se deixou sentir nunha boa parte da provincia de Lugo e sobre a propia capital procede do mortífico incendio que se mantén activo en Portugal e que ata o momento provocou a morte de 62 persoas. Así o confirmaron fontes de Meteogalicia, que sinalaron que a presenza de ventos do sur provocou o arrastre das nubes de tormenta, que xa deixaron algunhas precipitacións en diferentes puntos do sur de Galicia, e en consecuencia do fume provocado por este voraz incendio, que esta afectando os distritos de Leiría, Coimbra e Castelo Branco e no que traballan máis de 2.200 efectivos, entre eles bombeiros españois.
Nas imaxes do satélite pódese ver a evolución das nubes de tormenta ao longo deste luns e como os ventos do sur arrástranas desde Portugal a Galicia.
O portavoz de Meteogalicia descartou, no entanto, que estas nubes que o domingo chegaban a Galicia puidesen desencadear unha tormenta seca, similar á que o domingo se produciu nesa zona de Portugal. O aire cálido e seco dese día unido ás altas temperaturas provocou que a auga que caía da parte alta das nubes se evaporase antes de chegar ao chan, polo que a nivel de superficie a choiva non chegou a sentirse, aínda que si houbo descarga de raios, como o que orixinou a traxedia.
