Os servizos xurídicos da Confederación de Empresarios de Lugo (CEL), cumprido o ultimato que lle deron aos gandeiros que manteñen a tractorada na Rolda da Muralla de Lugo, elaborarán ao longo da mañá deste venres un escrito no que invocarán a Lei de Seguridade Cidadá, coñecida como Lei Mordaza, para pór fin a esta protesta.
"Os servizos xurídicos da CEL están a elaborar un informe en base á legalidade vixente, para comunicarlles tanto á Subdelegación do Goberno como ao Concello o que nós consideremos que xuridicamente cabe para pór fin a este acto de sitio da cidade", dixo a Efe o secretario xeral da CEL, Jaime López.
Desde o seu punto de vista, "hai un argumento moi claro, porque a Lei de Seguridade Cidadá, que foi reformada durante esta etapa de goberno, establece no seu articulado un aspecto fundamental" para pór fin á tractorada que ocupa o centro de Lugo desde hai un mes.
Jaime López referíase a que "cando hai vehículos que obstaculizan a vía pública, podendo xerar problemas no ámbito da circulación e demais, a Subdelegación do Goberno ten as competencias para poder retiralos".
A CEL invocará a Lei de Seguridade Cidadá para pór fin á tractorada
Os empresarios da cidade redactan un escrito apelando á intervención da Subdelegación do Goberno e do Concello, unha vez cumprido o ultimato que lle deron aos gandeiros
