Non só os comercios apuran as rebaixas, os propietarios de locais céntricos desocupados tamén. A caída nos prezos de aluguer dos baixos do recinto histórico da cidade, que nalgúns casos ascende a máis do 20%, está a seducir ás franquías. Esa oferta máis atractiva está a xerar certa renovación de negocios, xunto á que supuxo a desaparición das rendas antigas.
Nun par de semanas abrirá unha franquía da marca británica de calzado e complementos Clarks nun céntrico local duns 100 metros cadrados que se atopa na Rúa Armanyá, na esquina coa Rúa Conde Pallares.
Este é un exemplo da media ducia de locais que nas próximas semanas reabrirán no corazón da capital lucense con novos inquilinos.
Dando un paseo polas principais vías comerciais do centro apréciase que estas manteñen o seu poder de sedución, a pesar dos tempos críticos. E tamén cada vez é máis patente que os negocios tradicionais seguen perdendo terreo en favor de franquías de multinacionais.
Esa renovación é máis visible nas rúas Raíña e Progreso. Nesta última, na esquina coa Rúa do Teatro, abriu hai pouco máis dunha semana unha tenda de Dayaday, unha firma de moda e complementos cuns 60 establecementos en toda España.
Toda unha vida. Case sen solución de continuidade Dayaday colleu a testemuña dunha histórica, Dama, que pechou en decembro, tras dúas xeracións dunha empresa familiar, que deixou atrás os 60 anos de vida que tivo este negocio.
Téxtil e calzado copan os establecementos destas dúas arterias comerciais da capital lucense. Nas próximas semanas está previsto que abra na Rúa Progreso outra firma de moda e complementos, Coosy, que conta con tendas propias e asociadas en todo o país e, que como Dayaday, tamén dispón dun escaparate online para os pedidos dos seus clientes.
Outras aperturas non supoñen o desembarco de novas firmas, senón simplemente o cambio de localización de xa existentes. é o caso da franquía da marca da deseñadora ourensá Purificación García, que ten previsto reabrir dentro dunha semana na Rúa Raíña, deixando así o local que ocupaba na rúa Progreso.
Un mes máis tarde, segundo anuncian os carteis que hai colocados no seu escaparate, reabrirá, con nova dirección, a tenda de calzado Messalina na Rúa Doutor Castro, que pechou recentemente por xubilación da súa anterior propietaria.
