Representantes do sindicato policial Jupol, de recente formación na provincia lucense e que representa á formación de ámbito nacional Jusapol, reuníronse este venres coa subdelegada do Goberno, Isabel Rodríguez, para presentarse e informala das reivindicacións dos policías nacionais, entre elas a necesidade de contar con máis axentes en Lugo.
Na reunión participaron o secretario provincial de Jupol en Lugo, Daniel Sinde; o secretario de organización e asuntos xurídicos, Pedro Trabazo; e o secretario de acción sindical e novas tecnoloxías, Juan Moscoso. Entre as demandas que Jupol reclama na provincia lucense destaca a falta de efectivos policiais. "Lugo conta con 40 policías menos dos que esixe o seu catálogo de postos de traballo, que ademais está mal taxado; e nas comisarías de Viveiro e Monforte tamén botan de menos máis persoal", conta Daniel Sinde. Denuncia ademais que, sobre todo nestes meses de verán nos que a poboación e os visitantes multiplícanse na provincia, é difícil manter a seguridade dos cidadáns.
As reclamacións de Jupol tamén expoñen a equiparación salarial co resto de corpos de seguridade. Algunhas das medidas que piden para lograr esa igualdade de soldos entre axentes son que o diñeiro da subida salarial pase do complemento específico singular ao complemento específico xeneral; que as asistencias aos xuízos retribúanse, do mesmo xeito que xa se fai ao resto de corpos; o aumento do pago das horas extras de forma equiparable que ao resto de forzas do Estado; a reclasificación ao grupo B salarial da administración dos policías nacionais, ou o resultado dunha auditoría na que se analiza se os 800 millóns de euros para a equiparación salarial entre os corpos de seguridade son suficientes para ese labor.
Outras medidas expostas foron unha única mesa do consello de corpos de seguridade con capacidade de emitir decisións vinculantes e un plan integral nacional contra os suicidios de membros das forzas da orde.
