A fauna que vive na contorna de Lugo non deixa de xerar expectación. Dous camións de bombeiros volveron este venres ao río Miño para intentar rescatar a un corzo da canle fluvial. Os bombeiros foron alertados por varias persoas que, este venres a media tarde, paseaban pola contorna da antiga fábrica da luz, preto dunha pasarela de madeira que está rota.
Ao parecer, o corzo foi visto dentro do río pero camiñando dado que era unha zona onde había pouca auga e non cubría. Descoñécese que pasou despois dado que os bombeiros non atoparon o mencionado animal, o que fai supor que saíu do río polo seu propio pé.
XABARÍNS. Un horto de patacas das Gándaras sufriu as consecuencias dos xabaríns, Segundo denunciaron algúns veciños, os animais arrincaron varias plantas. Ademais, os xabarís tamén entraron noutra leira e fixeron un buraco nunha tea metálica. A veciñanza pide, para evitar isto, que se roce a maleza co fin de que non atopen zonas de acubillo.
