Os xabarís paseáronse pola Piringalla e a Avenida da Coruña e volveron pór en xaque a seguridade do tráfico. Varias patrullas das policías Nacional e Local actuaron para espantar varios exemplares que roldaban pola zona.
Os axentes, nun operativo que chamou a atención de moitos veciños, intentaron afastar os animais das zonas nas que poderían provocar perigo para a seguridade viaria.
As incursións dos animais na cidade levan meses sendo habituais. Provocan expectación, pero tamén situacións de risco, polo que a Policía ten que actuar para sacalos das vías onde poden propiciar accidentes de tráfico.
A Xunta xa dispón dos permisos da Deputación e do Concello para colocar en terreos da súa propiedade dúas gaiolas co fin de atrapar aos xabarís que merodean pola contorna da cidade e que en ocasións penetran nela. Prevé colocalas esta semana, en lugares que non dará a coñecer ata que o plan finalice.
Persoal da Consellería de Medio Ambiente ocuparase de vixialas, por se entran outros animais e para trasladar ao Veral os xabarís que entren nelas. Alí, os exemplares serán sacrificados.
O Goberno galego indicou que, só se o plan das gaiolas falla, optarase pola caza con arco, unha fórmula xa aprobada e para a que hai tiradores preparados. O sistema de captura de animais mediante tiro con arco aprobouse noutras cidades, como Vitoria.