Os xabarís continúan facendo incursións pola cidade e este venres un grupo numeroso de animais paseouse pola zona de Fonte dos Ranchos, cara á contorna da Cheda. A presenza dos animais chamou a atención dos veciños, a pesar de que están xa bastante afeitos, pois nesa zona da cidade levan meses facéndose ver, de modo que moitos condutores son conscientes xa de que deben extremar a precaución en vías como a Ronda do Carme.
Algún veciño ironizaba este venres co fácil que o terían os arqueiros para actuar nesa zona da cidade, na que os animais se pasean con total tranquilidade. A pesar dos meses que levan rexistrando as incursións de xabarís, aínda non se fixo nada para controlalos. Dicían que se avisou á Policía Local e que non acababa de acudir.