Axentes do Corpo Nacional de Policía continúan revisando "ao detalle" as gravacións das cámaras de seguridade para tratar de identificar os individuos que asaltaron na madrugada do pasado 7 de decembro a sede central de Caixa Rural, situada na rúa Montero Ríos, en Lugo.
Fontes policiais informaron a Efe de que a investigación policial continúa e os encargados das pescudas están revisando todas as gravacións para buscar detalles e pistas que permitan identificar a algún dos catro individuos que entraron na entidade financeira logo de rebentar a fechadura da porta principal con picos.
De momento, segundo os mesmos informadores, ese traballo aínda non deu os seus froitos, porque os axentes encargados do caso aínda non conseguiron identificar aos asaltantes.
En todo caso, están a seguirse, ademais, outras liñas de investigación para identificar, localizar e deter aos ladróns que conseguiron fuxir da Policía logo dunha espectacular persecución por varias rúas da capital lucense.
