Axentes da Policía Nacional adscritos á Brigada de Policía Xudicial imputaron un mozo veciño de Lugo como autor dun delito leve polo roubo da carteira a unha muller á saída dun supermercado na zona de Fingoi.
Segundo informou a Policía Nacional, os feitos denunciados pola muller sucederon a mediados de novembro cando a denunciante que estaba na vía pública falando por teléfono coa carteira na man, "de forma súbita achegóuselle un mozo que, tras propinarlle un lixeiro empuxón, arrebátalle a carteira, que contiña, documentación persoal e diñeiro en efectivo, uns 300 euros", concretou.
A muller despois do feito saíu á carreira detrás do autor, xunto cun transeúnte, e observou ao individuo acompañado por outros dous. Tras as investigacións pertinentes, con visionado de cámaras, declaración de testemuñas e reconstrución dos feitos, os policías encargados da investigación puideron identificar ao autor material dos feitos, así como aos acompañantes.
Todos eles novos, os dous aos que non se lles imputa nada, por non intervir na acción, menores de idade e o autor material de 19 anos, sen antecedentes, sinalou a Policía.
De todo iso foi informada a autoridade xudicial, á espera do correspondente xuízo oral.
