Un proxecto do Campus Terra, que conta co financiamento da Deputación de Lugo, permitiu constatar a viabilidade do cultivo de árnica montana en Galicia, ademais de comprobar que "o habitual quimiotipo ibérico desta planta" en territorio galego "amplía as súas propiedades medicinais", o que "esperta unha maior demanda por parte da industria farmacéutica".
Son resultados preliminares dun proxecto no que levan dous anos traballando os profesores Rosa Romero e Manel Vera, xunto con outros investigadores da Escola Politécnica Superior de Enxeñería e da facultade de Veterinaria de Lugo.
De momento, eses resultados preliminares "non fan máis que ratificar o potencial dun recurso natural silvestre que, atendendo aos ensaios desenvolvidos, tamén se podería cultivar", segundo informa a USC.
As propiedades farmacolóxicas e medicinais da árnica, unha planta con efectos antiinflamatorios, son incluso "máis acentuadas" no caso da maioría das poboacións de árnica en Galicia, segundo explica a investigadora do departamento de Produción Vexetal da USC Rosa Romero, que xa participara en estudos previos sobre esta planta.
Sostén que a maior vantaxe competitiva da árnica en Galicia, en relación con variedades desta especie presentes noutras rexións, é que produce menos efectos alerxénicos". Trátase dunha "singularidade que, como é obvio, incrementa o interese por parte das industrias e das compañías farmacéuticas", aclara.