Polo menos cinco cans foron intoxicados nos últimos días tras pasear por distintas zonas verdes, entre elas os parques Marcos Cela e Rosalía de Castro. Un dos cans envelenados -Zuri, unha mestura de Golden Retriever e Labrador- tivo que ser ingresada nun hospital veterinario de Montirón ás dúas horas de ir dar un paseo e tras presentar síntomas claros de intoxicación como somnolencia, falta de equilibrio ou tremor de cabeza.
"No hospital, dixéronnos que tiveran máis casos e eu, polo menos, sei doutros catro. Alí, déronlle un medicamento para vomitar e intentamos buscar a posible comida envelenada que puido inxerir, pero non apareceu nada. Quizais foi algo en po, máis difícil de percibir", di o dono.
O dono fixo un rastrexo pola zona, do mesmo xeito que a Policía Local. Con todo, non foi achada a sustancia coa que se puido intoxicar. "Poden ocorrer tres cousas: que se fumigaran os xardíns ou utilizaran algún veleno antitoupas (o que é raro en zona urbana), que alguén deixe algo alí adrede ou chegue ata o lugar casualmente ou que inxira haxix xa que é un lugar frecuentado por mozos que consomen porros", sospeita o propietario da cadela.
